風水命理開運專家

		報章名稱：東方日報刊登日期：2010年2月17日文章主題：開工六式　　　　　虎年創薪高

　　升職加薪係每個打工仔嘅願望，今次就請嚟玄學家區仲德師傅，為各位打工仔教路，睇吓喺新正頭第一個返工日有乜嘢要準備，好讓大家能夠食住旺氣，賺到盆滿缽滿！

第壹式：衣色谷事業
　　為咗應節，好多人首日開工都會揀番套紅色衫。區師傅就話想谷事業運，其實唔係人人都需要着到成個「利是封」咁返工，反而應該揀隻啱自己生肖顏色嘅衫，先至有利事業運。

各生肖適合顏色
虎：白、黑、青、米黃
兔：金、綠、黃、粉藍
龍：藍、銀、紫、米黃
蛇：灰、綠、紅、啡
馬：白、銀、橙、粉紅
羊：金、青、紅、黃
猴：藍、黑、啡、粉藍
雞：灰、青、橙、米黃
狗：白、黑、紅、粉紅
豬：金、藍、黃、米黃
鼠：藍、綠、橙、啡
牛：灰、銀、紫、粉紅

第貳式：返工擇吉時
　　任何喜慶日子都講求擇個吉時先至大吉大利，而新年開工當然唔例外，咁先可以食正旺氣。區師傅表示，今日最好喺朝早7點至9點之間出門口，然後向東行，自然可以升職發財。如果想令事業運更上層樓嘅話，則可以喺大門口上掛番套「聚富財寶」至開工。

第叁式：升職有辦髮
　　整番個醒神髮型，老細對你的印象分自然爆燈。區師傅話，整番個配合自己生肖嘅髮型，上位更加容易。

各生肖適合髮型
順直長髮：龍、雞
波浪鬈髮：牛、馬、豬
軍裝短髮：兔、猴
蓬鬆頭髮：鼠、蛇
堅挺硬髮：虎、羊、狗

第肆式：飾物催運勢
　　潮男潮女都興佩戴飾物，想喺虎年事業有突破嘅話，區師傅認為只要配搭適合所屬生肖形狀嘅飾物，如手錶、耳環、眼鏡等，不但有助催谷事業運，更能得到上司和同事的幫助添！

各生肖適合的飾物形狀
正方形：虎、羊
長方形：兔、雞
三角形：馬
六角形：鼠、猴
菱　形：龍
心　形：蛇、狗
圓　形：牛、豬

第伍式：晶石有運行
　　唔同嘅晶石不但對趨吉避凶有着神奇嘅作用，更能對持有者產生唔同效果，故此唔少人都會喺公司擺放各種晶石擺設或裝飾。區師傅提醒大家應該擺放配合所屬生肖嘅晶石，自然可以谷盡事業運，升職加薪有望！

各生肖適合的晶石
虎：紫水晶
兔：粉紅水晶
龍：海藍寶
蛇：什髮晶
馬：綠髮晶
羊：紫黃晶
猴：金髮晶
雞：碧茜
狗：蜜蠟
豬：螢石
鼠：斑彩螺
牛：白水晶

第陸式：擺設增旺氣
　　喺辦公室枱頭擺放一啲小擺設，既可美化辦公環境，又能顯示個人品味。區師傅話，原來這些擺設仲可以起到催動事業運嘅作用。只要喺枱頭嘅左右兩邊，擺放配合生肖嘅擺設，便能有助化解是非，至啱一啲經常被小人同金手指纏擾嘅打工仔。

各生肖適合的擺設
左邊（催旺氣）右邊（化是非）
虎：銀包青金石
兔：記事簿虎眼石
龍：蘭花盆香水
蛇：黃水晶球太歲牌
馬：襟花絲巾
羊：財神公仔茶晶石
猴：金元寶黑玉石
雞：菊花盆葫蘆
狗：龍形飾物金吊嘴
豬：貝殼天河石
鼠：通勝銀手鏈
牛：玉石白水晶球

開工避忌免破財
　　雖然區師傅講咗咁多，但如果想事業順風順水嘅話，有啲宜忌仲一定要留意！

1）剪指甲易失財
　新年第一日開工，有人會剪吓指甲，整理一下儀容，點知區師傅話千祈唔好咁做！原來剪指甲會破壞財氣，因而令財氣流走。

2）講粗口惹是非
　開工日講粗口容易招惹是非，尤其係對經常要同客人接觸嘅人，開工日講粗口更容易令事業出現波折，故此大家都係忍吓口。

3）白帽犯桃花劫
　單身人士都想喺虎年行桃花運，但桃花劫就可免則免，除咗會惹禍上身，更隨時難以甩身。唔想犯桃花劫嘅話，記得開工日唔好戴白帽。

公司方位要睇睇
　　辦公室有九個唔同嘅方位，如果可以食正適合方位嘅話，更能得到貴人扶持！相反坐正個病符星、是非星等唔好嘅方位，想有好發展都難。

旺財星到中宮
　　虎年旺財星將坐落中宮，故此要保持呢個位置乾淨清潔，配合一個招財寶箱，提升收納財氣之效，自然可以賺個盆滿缽滿。

名譽星到正東
　　打工仔最想出人頭地，而虎年名譽星將坐落正東方，最好喺呢個方位擺放米黃或金色嘅擺設，例如花樽、地氈、窗簾等，千祈咪放紅色同綠色物品！

爭鬥星到東南
　　爭鬥星不但代表容易同人起爭執，更容易招賊入屋。最好移開東南方嘅發熱同高溫電器，並擺放黃色、啡色、白色嘅物品，便可避免同人起口舌之爭，專注於事業嘅發展。

是非星到正南
　　打工仔怕多是非，更怕被金手指篤背脊，今年是非星坐落正南，故此唔適宜喺呢個地方擺放綠色嘅物件，反而放置紅色物品，可以化是非為祥和。

災難星到西南
　　要避免災星入侵，區師傅話要避免喺呢個方位擺放電視、電腦等發熱電器之餘，放一個銅錢或一串五帝錢，便可消災解厄！

桃花星到正西
　　桃花星除咗代表姻緣運外，仲代表人緣。對於經常接觸人嘅工作，就最好喺正西方擺放白色同黃色嘅花催動桃花，仲可以得到貴人幫助。

喜慶星到西北
　　升職加薪都係喜慶事，當然要搵正個吉位，接住喜慶星啦！今年喜慶星將坐落西北方，如果保持呢個方位空氣流通兼擺埋個魚缸嘅話，自然喜上眉梢。

文昌星到正北
　　文昌星除咗可以令人才思敏捷外，仲可增強升職及轉好工嘅運勢，故此大家千祈唔好喺正北位擺放大型金屬物件，反而應該放個文昌貴神寶盒，收納文昌旺氣！

病符星到東北
　　唔想受病魔困擾，記得唔好喺東北方擺放紅、紫同綠色嘅物品，自然可避免被病符星侵擾，身體健康事業自然好。