區仲德公司靚景聚財  -- 東周刊

       身為風水師，自己唔掂，試問仲點樣幫人呢？日前係玄學家區仲德公司嘅喬遷之喜，東姑去到佢嘅新公司。

　　第一句問區師傅：「師傅你之前嗰間office有乜唔好？點解要搬？」佢好大聲咁回答：「搵到錢梗係要搬呀！呢個景望住成個跑馬地，形成一個聚寶盆，我等咗呢個單位好耐嘞；加上，舊時嗰邊淨係可以坐四十個學生，呢度就可以坐近一百個。」

       新公司開幕當日，區師傅將賓客分咗三場，包括：親戚朋友、徒弟以及客人，加起嚟差唔多有成五百人，佢仲話以前嗰度實用面積得一千四百呎，呢度有成二千四百呎，淨係裝修費都使咗百幾萬，你話區師傅掂唔掂呀？