風水師區仲德 打造玄美家 玄富之家 -- 星島日報
區仲德博士訪問如下:
玄學家區仲德行走風水命理界30幾年，客戶包括富商、名人和明星藝人，幫人睇風水布陣轉運不計其數，自己搬新屋自然大手筆豪裝一番，打造「玄」美之家。
身為玄學家的區仲德，年半前因緣際會之下，購入這個位於又一村花園的靚單位，他大讚風水一流：「揀屋要夾命配八字，同埋本身間屋要當運先帶旺氣，呢度八運裏面向東南，本身係旺山旺向，所以搬入嚟住之後，發生好多開心事，風水梗係一流啦！」
老友明益2,580萬轉讓
區師傅指，搬入新屋短短5個月以來，好事不斷發生，錢債官司未打先贏，順利收回客戶欠款之外，早2星期前的小股災更因為外遊避過一劫，返港後再順勢趁低吸納，賺到盡。
就連單位價錢亦堪稱「激筍」價，上手富貴業主以平市價近2成的價錢明益老友，年半前以2,580萬元買入這個近2,000方呎大宅。區仲德坦言執到平貨：「呢個朋友好有錢，20幾間鋪收租，有仔又有孫，請食飯餐餐鮑參翅肚，呢度1.2萬幾蚊一呎，真係九龍塘嘅樓，屯門區嘅價錢嚟㗎！」
區氏夫婦當然精心打造完美安樂窩，「我太太以前喺英國讀書，佢鍾意歐式設計，我就負責全屋布咗二十幾個風水局，因為要按程序、計日子、計位置、計五行夾命，所以係需要啲時間。」
裝飾布置隱藏風水陣
全屋裝修工程耗時12個月、花費500萬元、分十個不同裝修師傅人手打造。大廳歐洲宮廷式設計，隱藏不少玄機在其中，客廳所有門戶、窗戶，皆放上藝術品一樣的象擺設，可吸財化煞。窗台左右兩邊放上龍龜守護，也為屋企人擋災、化是非。
主人房牀頭一左一右的花飾掛燈和玫瑰花油畫，結合成花好月圓的布局，再配合愛情寶箱，難怪區仲德和太太結婚多年，夫妻一直咁恩愛。區師傅認為，「風水學上有逾千種風水局，我屋企只有廿幾個，一啲都唔誇張，最緊要適合自己，好似啲寶箱咁，好似手機apps一樣，只要放啱位，就會發現好快幫助增強運勢，過去30幾年睇風水，證明到絕對有效嘅。」
