風水命理開運專家

		報章名稱：東周刊刊登日期：2002年02月13日文章主題：吸Twins旺氣大法

頭髮助添丁　聽歌有橫財

　　蛇年要講最當旺、最人氣急升，相信非英皇二人女子組合Twins莫屬。

　　兩位少女出道只短短大半年，已成為「萬人迷」。兩位點解咁當旺？皆因二十歲的蔡卓妍同埋二十一歲的鍾欣桐，都有一副好命水。區仲德堪輿師，都不約而同話Twins馬年都仍然會紅到發紫，豬籠入水。區仲德還公開借運大法，讀者們只要馬年日日攬住Twins，就會同Twins一樣，撈到風生水起。

　　兩位Twins成員蔡卓妍與鍾欣桐，分別屬狗同埋屬猴，雖然兩人出生於不同年份，但兩個咁橋都是命格屬土，據堪輿師區仲德測算，屬土即係吸水，故兩人一生都會多財運，難怪Twins出道短短日子，唱片銷量已賣到嘭嘭聲。

　　Twins原來仲有旺夫相，不過，這兩年Twins暫時都未行桃花運，所以阿Sa（蔡卓妍）同阿嬌（鍾欣桐）馬年都甚少有緋聞，雖然冇愛情滋潤，但呢兩位天之嬌女在馬年繼續行運行到落腳趾尾，財源滾滾來，旺氣甚至多到可以照在各位，區師傅話只要你黐實Twins，就有運行喇！

借Twins運六大法

　　據堪輿師區仲德講，相學內，有一種名為借運大法。如果各位想發新年財，不妨試吓攬住Twins！依家就等區師傳講吓，點樣沾Twins啲旺氣嚟用。

一　靚相利正財

　　只要將自己張相，背後寫上自己個名，再加埋Twins張相，後面同樣寫上兩人嘅名。之後將兩張相放埋一齊帶喺身，咁就可以借助Twins嘅運氣帶旺自己。

　　若果將兩張相擺響屋企中間位置，即係大廳正中央，擺一輪後，就可以提升正財運。如果想贏麻雀，放響屋嘅西北位，咁就可以大殺三方。

二　CD旺橫財

　　今年年初三係賽馬日，區師傅提議馬迷不妨帶張Twins嘅CD喺身，然後向住南邊嘅售票機位買馬，必有斬獲。Twins嘅CD唔單止助財運，區師傅仲話只要響屋企嘅西南位擺部CD機，用張紙寫低自己出生日期同時辰八字放喺隔離，跟位再播Twins嘅歌仲會帶旺事業添，想有桃花就响東北聽Twins嘅歌，包保情人快到你面前。

三　海報旺桃花
　　Twins嘅歌迷一定會喺屋企貼滿佢哋嘅大海報，但區師傅話千祈晤好亂咁貼，一貼錯位就真係大吉利是。區師傅說，「千萬唔好貼啲海報響正東位，咁會出現災難，或者感情出問題。」

　　海報最好貼喺西南位，紅色底嘅海報貼西北位就催財，貼正西位就有助愛情，效果仲好過播CD。

四　公仔助偏財
　　最近Twins推出限量版人形公仔，區師傅聲稱一樣可以照用唔好嘥，大家不妨放喺西南「文昌」位同西北「偏財」位。區師傅又補充：「如果你哋買個公仔有靚號碼好似八；就放西北位；一號就放東北位同埋六號放東南位，咁就事半功倍。」

五　肖像利學業
　　雜誌即係「書」，區師傅話「書」就當然代表莫，但如果家長將Twins做封面嘅雜誌放喺西南「文昌」位，一定可以幫助仔女嘅讀書運。

六　頭髮旺添丁
　　如果你真係咁好彩，攞到Twins嘅頭髮，咁就發囉。只要將佢條頭髮同自己嘅頭髮綁埋一齊，放喺正西位咁就可以帶嚟喜事，好起嚟仲可能係有喜有BB。

　　即使攞唔到頭髮亦唔緊要，只要有幸被Twins搭吓膊頭，或者用印有佢哋嘜頭嘅產品；又或者將佢哋貼紙貼喺自己物件，好似手提電話同銀包咁，都一樣可以帶來好運架！