風水命理開運專家

		報章名稱：蘋果日報刊登日期：2007年02月17日文章主題：今晚上頭炷香向南拜最旺財

　　終於到了年三十，新一年即將來臨，你有甚麼願望？有十萬樣願望想講？等一等先，食完團年飯咪去年宵住，請你預定在今晚吉時，對準靚方位去上頭炷香，包你豬年心想事成。未決定去邊度上頭炷香？一於去有求必應的黃大仙廟！仲有玄學家區仲德師傅你上香五部曲，大家要打醒十二分精神記住啦！

黃大仙上頭炷香　願望快達
　　「頭炷香」一詞，一般有兩個意思：一是藉該年第一次上香，將願望向神明反映，祈求早日達成；另一意思是第一個上香的人，就會得到神明最大的保佑及祝福。唔怪得之每逢年三十晚，不少市民都趕去廟宇爭住上頭一炷香。

　　玄學家區仲德師傅說：「人人爭住去上頭炷香，係因為每逢新年伊始，就會有大班神仙出來幫助善信解憂，而最早個就會最快得到神明幫助。至於今年上頭炷香，吉時為年三十晚 11:00pm，至年初一凌晨 1:00am（即今晚 11:00pm至凌晨 1:00am），去出名有求必應的黃大仙廟霸頭位上第一爐香，只要誠心向神明祈願，願望就好快可以達成。」

上頭炷香　五部曲
　　今年是丁亥豬年，究竟邊個方位最旺財、最旺姻緣、最利健康呢？區師傅就建議，「上頭炷香首先要知道自己想求甚麼，因為各有不同旺位，跟住個位來拜三拜，再去個神壇度上香，成個豬年就可以行個大運！」區師傅亦提醒各位，屬豬人士最好帶埋屬兔朋友一齊來上香，夾好今年「三合」位；進入廟內應以左腳入先，一路講住好說話，來年就會旺上加旺。

五部跟住做
1.最好先行自備香燭，以免在人多擠迫的情況下臨時購買兼坐地起價。
2.在點香位點香，用人手撥熄香火，因為以口吹熄會對神明不敬。
3.完成燃點香燭要盡量舉高，以免傷及他人。
4.對住神壇誠心禱告，口念想達成的心願，向神像拜三拜，把香插在壇前。 5.將香燭冥鏹放到收集箱，由廟祝集齊代為燃燒。

對應方位　各有所求
　　區仲德師傅話上頭炷香，最重要不是要爭第一個。第一個自然好，之但係咁多人，又點可以真係人人做到第一位？所以區師傅提點大家，由於每一日的吉位都唔同，所以上頭炷香應該要對準個靚位，誠心地求拜，黃大仙知你有神心，想實現願望？不難！知道了邊一個方位最靚，仲要配合埋自己生肖，穿當旺顏色的衣服，豬年就可以得心應手啦！

●講開方位，區仲德師傅話豬年的災星位是東北，可以買串古錢對住東北求拜，可即時化衰氣。

上頭炷香必備祭品：
●大香三枝上主壇$20
●五個生果$15
●黃大仙祈福用元寶$38
●燒肉或燒豬$20

順便買埋　開運飾物
　　既然去開黃大仙，不如買番大吉大利旺財又添丁的飾物返屋企，去除上年衰氣，等豬年事事順景行個大運。區仲德師傅話可以根據豬年流年運程，將飾物對正吉位，然後返屋企放於該位置，全年都可以咁順景，「如果係想旺財，就買個招財進寶的飾物，向住今年個財位西南方拜三拜，之後拎番屋企，放正西南面，包你今年行個大財運！」仲有今年虎、蛇、豬、猴都犯太歲，記得要掛個太歲牌，順便燒埋道太歲符，去除衰氣。

文武廟上頭炷香　求學業
　　文武廟供奉文昌帝及關帝，來這上頭炷香，一樣可得到神明庇佑。事關文昌帝及關帝都是傳奇人物，生前已受萬民愛戴，死後成仙亦不忘平民百姓，一直庇佑住他們，令民眾興建文武廟來供奉兩位德高望重的神祇。來到文武廟上香，入廟前記得要先敲鐘擊鼓，話畀文武二帝知你到廟參拜，若你有心願望都實現得快人一步。香港、九龍及新界都有文武廟，區仲德師傅就話，「年三十上頭柱香最好去上環荷李活道那間文武廟，因為人氣好旺，之不過較適合求學業的善信。如果想要求財，都係去黃大仙最好。」

注意三件事
1.先到寶燭櫃位買參神寶燭。
2.到廟時敲響大鼓，以提升氣勢。
3.再進入正殿上香參拜燃燈佛、觀世音菩薩及其他神靈。

記得求籤
●求籤需於神壇上取出籤筒，口誦想問的運程如事業、姻緣，求得籤後去寶燭櫃位用$2買籤文。

　　如果上頭炷香當日有時間，不如去求番枝好籤。因為年初一去求籤，順住個人氣同運氣，求枝上上籤都會容易好多，所以晚求埋枝好籤，再去行年宵行大運，包你豬年旺、旺、旺。

必備祭品
●文武廟寶燭櫃位有一包包祭品選購，上頭炷香記得買包送畀神明。
●去文武廟拜神仲要有芹菜同，保佑你聰聰明明。
●拜文武二帝要用文筆點硃砂、武筆點上墨，再燃點三枝長香及祭文昌衣就禮成。

車公廟上頭炷香　轉運氣
　　區仲德師傅說上頭炷上最好係去黃大仙，不過有部份善信住的地方不方便、不就腳，其實也可以去附近的廟宇上香。好似沙田的車公廟，本來應該在年初三去上香轉風車，不過想上頭炷香的人若覺得去黃大仙太遠，車公廟也是一個次選，年初一轉轉風車轉個運，個人都可以有番旺氣。

上香切記
1.準備元寶香燭，帶五個生果及燒肉，向主壇拜三拜再上香。
2.車公廟有個大的四葉風車，轉一圈可以去除衰氣，豬年行大運。
3.拜完神，記得要買個風車返屋企，全家都可轉轉運！