風水命理開運專家

		報章名稱：太陽報刊登日期：2003年01月16日文章主題：羊年四角關係大結局

　　羊年將至，多角關係錯綜複雜，其中以阿嬌（鍾欣桐）和陳冠希、余文樂之間的最為矚目，堪輿學家區仲德師傅為圈中緋聞男女預測羊年感情走勢，教他們催旺桃花運！

阿嬌阿樂有半年開心
　　踏入羊年，張栢芝、陳冠希、余文樂和阿嬌這組四角關係將會如何發展？區仲德師傅說：「喺上半年初，鍾欣桐仍然糾纏喺兩個男仔之間，而余文樂就好依戀個女仔，佢哋兩個喺新曆四至六月間仲會相處得好開心，但到下半年，呢段感情就會愈來愈淡，到Ｏ四年就會告終。」至於陳冠希和鍾欣桐，區仲德師傅說：「陳冠希呢幾年嘅感情運都比較弱，Ｏ六年前喺佢身邊嘅女仔都唔係真命天子，而佢同鍾欣桐仲早啲玩完，大約八月就會分手。」

　　而區仲德師傅曾指張栢芝「命硬」，要找一個「命旺」的男仔才頂得住，那陳冠希又是否旺「頂得住」呢？區仲德師傅說：「佢秋天出世，金同水都好重，但火就弱，不過佢頂得住，但係我講過，陳冠希要到Ｏ六年先有真命天子，所以佢兩個都只係霧水情緣。」

楊千嬅鄭中基有危機
　　「千嬅下年有好多貴人幫，搵錢仲多過Ｏ二年，而鄭中基呢三年都有運行，賺到錢但係留唔到，要到Ｏ四年先真係搵到錢同埋留到喺身。千嬅本身份人好純，但係就好主觀，同埋佢個鼻有節，愈遲結婚就愈好，最好四十歲之後結婚就更加好，可以白到老，如果唔係就會好易離婚。」

　　「至於千嬅同鄭中基，睇佢兩個命格，千嬅係剋制住鄭中基令男方覺得好煩惱，而佢兩個會繼續離離合合，最後要到Ｏ六年先至可以穩定。」

栢芝霆鋒形同陌路
　　區仲德師傅說：「霆鋒命格會有好多女人緣，不過喺佢二十九歲前出現嘅女朋友都唔係真命天子。至於王菲就鍾意屬木嘅男仔，而霆鋒個命格就係屬木，所以王菲係會好『黐』霆鋒，如果佢哋兩個嘅感情，可以捱到霆鋒二十九歲就可以成事。但如果王菲想同霆鋒穩定啲，我提議佢搵間屋個桃花位喺南方，再喺南位度放加強桃花運嘅物品，好似粉紅水晶咁就最好。」

　　「至於栢芝呢幾年都命帶桃花，但就係桃花劫，佢二十七歲前嘅感情都唔係咁穩定，同埋佢命格有『陽刃』，即係話佢命硬，屬於『刑剋夫婿』，所以佢一定要搵啲命旺同命硬嘅男仔先可以夾到，而霆鋒同小春都唔夠旺同硬，所以佢兩個都夾唔到相芝。至於小春同栢芝本身就水、火相沖，拍一陣就會面左左，而小春喺羊年嘅感情，暫時都係混淆不清，要到Ｏ四年佢嘅感情生活先會穩定落嚟。」區仲德師傅表示，羊年栢芝、霆鋒和小春都會成為陌路人，而王菲同霆鋒就很有機會復合。

鄭秀文古天樂唔長久
　　「Sammi同安仔嘅感情喺Ｏ二至Ｏ三年出現變化，呢段時間係佢哋兩個嘅感情變化期，而Sammi要到Ｏ四年，感情運先會定落嚟，唔會有咁多感情煩惱，如果佢哋兩個呢段感情可以維持到下年底，咁就可以結婚，但係要留意安仔呢兩年桃花都好旺，同埋佢個人多心未定，所以要小心。如果Sammi同安仔唔想感情咁多波折，佢哋可以喺屋企嘅北面放啲旺桃花運嘅嘢，咁會有幫助。另外，安仔家住何文田，隔籬係醫院，如果佢結婚後千祈唔好住喺度，因為咁會影響有BB生。」

　　「而古仔同Sammi嘅感情其實只係屬於霧水情緣，就算兩人喺一齊，都只係短暫嘅緣分，唔會長久。而古仔呢幾年主力喺事業，佢三、五年內都唔會結婚。」

催旺桃花小貼士
　　區仲德師傅指羊年的桃花位是在南方，如果想催旺屋企的桃花運，只要在家中的正南方位放一些可以催旺桃花運的物品，包括：粉紅水晶、紫水晶、桃花盆和心形的水晶等。除了水晶和桃花盆外，區仲德師傅說：「如果大家已經有咗另一半，就可以加埋兩個人嘅合照，合照後面寫埋兩人嘅八字，同埋啲水晶放喺南方桃花位，就可以穩定大家嘅感情。」

　　至於本身命格的桃花位，凡生肖是虎、馬和狗的就是在家中的東位；蛇、雞和牛就在南位；豬、兔和羊就在北位以及猴、鼠和龍的就在西位，只要在自己命格的桃花位擺放催旺桃花運的物品，就可加強個人自身的桃花運。