風水命理開運專家

報章雜誌 >> 時報周刊 >> 玄眼尋機：2013年月刊9月份 >> 玄眼尋機副刊 (P.9及P.10)

		月刊名稱：玄眼尋機刊登日期：2013年9月30日文章主題：玄眼尋機副刊 (P.9及P.10)

副刊 (P.9及P.10)

壞情人真面目

　　情人應品宣傳浪接浪，害得仍然掛單的姊妹酸溜溜，恨不得找個情人慰藉一下。有情人的當然會跟情人浪漫溫馨一番，不過作出重大決定之前，不妨參考以下圖表，再跟情人對照一下，如果有以下一例，最好三思，免得後悔莫及。

好男人
特徵：唇角向上 + 耳珠垂有肉且肉色紅潤 + 眉眼之間闊 + 鼻圓 + 眼圓
　　凡是臉形輪廓三尖八角的男人都很難是好男人，反之臉圓眼圓有雙下巴等看去圓潤顯和氣的，這個男人衰極有限，有以上幾項特徵的，就是重感情兼長情的好男人人辦。唇角向上為人樂觀之餘亦有情義。眼圓鼻圓再加眉眼之間閣，個人比較和氣及純品，冇乜歪念，唔會搵人著數，信得過。如果你情人係咁樣，恭喜你，唔驚俾佢呃兼一定對你好。

趙完唱
特徵：嘴唇太薄 + 三角眼 + 嘴歪 / 牙疏
　　揀情人最忌冇品，想享溫柔時冧語盡出，得手後鬆人已經夠衰，仲要周圍唱的就應攞去閹。凡是嘴唇太薄及眼形呈三角的人均無情自私，只著眼自己利益，再加上牙齒疏或嘴歪講嘢會好叻，樹上的雀仔都會被氹下來，但為人輕浮，唔單止守唔到秘密，仲講過唔算數，乜嘢山盟海誓，當係唱歌仔。跟這種玩認真，就好似將個心掉落屎坑，嘥晒兼臭晒！

急色鬼
特徵：眼睛不大但眼線深 + 口濕濕 + 下巴尖兼有坑 + 唇冇縱紋
　　口部代表需求，眼睛代表思考，眼線深的人思考力較弱，加上口濕濕口水沾唇，即需求大到根本趕不及思考後果，開心咗先算。遇埋下巴尖兼有坑。唇冇縱紋及唇形輪廓唔清楚等色心重特徵，這個男人唔飛擒大咬就怪，最弊係這種色中餓鬼自控能力較差，若見到比你更索的，或有人自動投懷，他必會來者不拒，趙完先算，完全冇責任心可言，就算攬住你，個心都可以諗第二個。

暴力狂
特徵：三白眼 + 眼凸 + 顴骨高 + 眉過濃
　　係女人都鍾意男人溫柔體貼，呵護備至，就算偶然發吓少爺脾氣，都唔係咁大罪。最憎男人對女人呼呼喝喝，呢啲叫man，叫威嚴？戇居！我話冇品就真。如果再打埋女人，就算幾愛你都係假嘅，男人有三白眼兼眼凸，加顴骨高及眉毛過濃，都是暴力狂，三句唔埋呼喝怒啤再郁埋手都唔出奇，除非你好愛佢又學過夜粥，咁咪當耍花槍囉。否則有個男人咁對你，你都死心塌地嘅話，咁呢啲就叫犯賤，冇人可憐。

軟飯王
特徵：眉尾有十字紋 + 左右鼻孔冇肉 + 臉大鼻細 + 腰太幼
　　有以上任何一項特徵的人都聚唔到財的，咁多項加埋，唔慌有錢剩。愛亂使錢，唔諗後果，屬於生無隔日之糧的相格，佢未必唔肯在你身上使錢，但使完可能掉轉頭問您攞番凸，甚至會為錢講大話呃你，搵你著數，最終由你養番佢，男人尊嚴，No way！有錢使就得！

無情漢
特徵：鷹鼻 + 唇薄 + 下巴尖細 + 耳仔尖冇肉
　　呢分鐘愛你愛到死，一旦有新目標，或感情不再，不單冇friend做，反轉豬肚就是這種人。話之你一哭二鬧三上吊，他都不會心軟，因為有以上特徵的人感情較淡薄，自私自利，樣樣事只諗自己先，對人冇乜人情味。你對佢好，會講句多謝，想佢以同等或加倍愛意相待，簡直妄想，當然他不會害你，不過典型無情漢就是他。