風水命理開運專家

		報章名稱：新Monday 刊登日期：2003年12月05日文章主題：5大合久必婚潮侶

　　以近期名人婚禮嚟講，何超儀同陳子聰嘅千萬婚就最哄動，見佢哋咁sweet，都好想知佢哋同其他緋聞男女婚後生活會變成點，所以我哋從民意調查選出街坊認為邊5 pair人結婚之後會甜蜜到爆。我哋重搵咗堪輿學家區仲德師傅測一測呢班人到底夾成點！

　　今次我哋訪問咗96個靚仔靚女，叫佢哋選出認為邊5 pair人婚後會幸福美滿。而堪輿學家區仲德師傅重批埋佢哋婚後會有幾多仔女添！

No.1 30票
何超儀＋陳子聰
夫憑妻貴

婚前：喺97年嘅時候，徐濠縈介紹陳子聰俾何超儀識，之後佢哋就自然發展成拖友，2人嘅戀情本來係密密寶實嘅，不過何超瓊漏咗口風，搞到地下情曝光。到今年3月，佢哋終於結束6年嘅愛情長跑，拉埋天窗。

婚後：佢哋喺婚禮方面無論搞傳統嘅中式婚禮，定係西式婚禮都一樣冇問題，所以今次嘅婚禮好啱佢哋。喺命格方面，超儀嘅權力會大過男方，鍾意控制人，不過子聰比較細心，會好遷就老婆，所以一定唔會離婚收場。而超儀嘅命格會旺老公，所以子聰喺事業上一定會穩定，重會夫憑妻貴添！之後亦會生番個仔，第時入埋娛樂圈，真係一家3口齊齊紅！

N0.2 27票
梁詠琪＋鄭伊健
一軟一硬

婚前：2人喺99年合演《仲夏夜狂想曲》舞台劇而傳出排聞，喺同年嘅10月4日發生「奪麵雙琪事件」，雖然伊健話喺98年已經同邵美琪分手，但GiGi依然被人認為係「狐狸精」。好彩佢哋冇因為咁而分開，直至而家感情仍然穩定。

婚後：GiGi係一個熱情、固執嘅人，而伊健反而係一個優柔寡斷嘅人，兩個嘅性格一軟一硬，真係夾到痺。不過正因為伊健係一個尊重老婆嘅人，所以佢嘅性格最啱傳統嘅中式婚禮。而伊健錫老婆之餘，GiGi本身都好旺佢，所以佢哋結婚之後，對伊健一定有幫助。喺仔女方面，佢哋會有1仔1女，可以籌夠一個「好」字，之後兩個一齊入埋呢行，想唔紅都唔得啦！

N0.3 17票
鄭秀文＋許志安
聽老婆話

婚前：佢哋喺91年合唱〈其實你心裡有沒有我〉而傳出排聞，但係雙方一直否認，喺00至03年期間，Sammi分別同任賢齊、古天樂、言承旭傳出排聞。01年TVB頒獎禮嘅「廚房宣言」更極其震撼，之後兜兜轉轉，最近再次傳出2人復合。

婚後：Sammi嘅個性坦白、直接，而且任性之餘都鍾意控制人，相反安仔性格務實，如果要婚姻順利，安仔一定要聽晒Sammi話。另外，安仔要增加星運嘅話，中式婚禮就最啱佢。雖然女方嘅性格比較任性，但係佢天生幫到老公，所以安仔同佢結婚之後，一定可以紅到老呀！之後個女重會入埋娛樂圈，第時一定似足佢阿媽又唱又跳，由年頭紅到年尾呀！

N0.4 14票
蔡依林＋周杰倫
中式最旺

婚前：吳宗憲喺00年知道Jolin欣賞Jay嘅才華，所以就介紹佢哋認識，之後2人分別被人拍到喺車上，同埋秘密遊日本。但係Jay嘅fans知道之後非常不滿，所以佢哋就轉玩地下情。其間Jay分別作咗〈布拉格廣場〉同〈說愛你〉俾Jolin，成為勁hit嘅歌曲。

婚後：Jolin本身性格善解人意，不過比較情緒化，而Jay就比較cool，做事獨斷獨行，但係Jolin咁純品，一定就到佢嘅！不過咪睇佢哋咁時髦呀，原來佢哋最啱搞中式婚禮，因為可以將兩個都帶旺埋喎！雖然佢哋兩個都係藝人，不過第時啲仔女，會走去做生意或者從事design行業，咁就可以幫阿爸阿媽design新形象啦！

N0.5 8票
楊千嬅＋鄭中基
難有高峰

婚前：99年5月，基仔同記者講力追緊千嬅，重作咗首以千嬅生日日期為名嘅歌俾佢。同年6月，佢哋嘅戀情公開，不過12月嘅時侯，千嬅喺演唱會上宣布同基仔已經分手，但係就冇講點解會分手，所以佢哋呢幾個月嘅戀情都幾模糊。

過婚後：千譁本身嘅性格好溫柔，好想得到老公愛錫，但係基仔啲性格就比較飄忽，所以雙方好易出現冷感，唔係咁穩定。不過佢哋本身嘅命格啱搞西式婚禮，唔驚會意見不合呀！另外，千嬅嘅夫星較弱，結婚之後唔會點旺老公，所以基仔喺事業上好難再有高峰。雖然係咁喎，但佢哋個女第時會做生意，而且事業會有一定嘅基礎，到時生活就唔使愁！

番外篇　合久必分潮侶
　　頭5 pair都被人睇好，不過有2 pair就啱啱相反，真係同人唔同命！

舒淇＋黎明
性指唔夾

婚前：佢哋喺98年合演《玻璃之城》嘅時候被傳有火花，喺同年再次合演《新戀愛世紀》而傳出緋聞，不過雙方一直否認拍緊拖。01年4月傳出Leon喺金鐘補祝舒淇生日。02年傳出2人同遊日本，被拍下前後腳出閘。

婚後：舒淇本身對工作冇咩要求，而且做事被動，相反，Leon係一個勤力、有進取心嘅人，所以佢哋好難會擦出火花。而且兩人都性格執著、衝動，即使婚後都會為小事搞到家嘈屋閉。

王菲＋謝霆鋒
難以長久

婚前：喺00年3月時，阿菲猜枚輸咗之後就以吻代酒，同年6月，佢哋手拖手公開戀情，「王鋒戀」可以話係一吻定情。喺02年3月「鋒芝戀」曝光，傳出霆鋒一腳踏兩船之後，就同阿菲分手，不過最後霆鋒選擇咗「王鋒戀」，同栢芝結束戀情。

婚後：咪睇阿菲咁cool呀，原來佢依賴心好強，但係霆鋒咁多女性纏身，成日令到佢不安，所以就算結咗婚都唔會長。而且阿菲同佢結婚，事業真係唔慌好得去邊。而佢哋啲仔女大有機會入番呢行，不過就好難會紅。