開運九招 助你橫財就手 今日係大年初三，先同大家講聲恭喜發財，橫財就手！而今日係新春賽馬開鑼日，對一眾馬迷嚟講，更係希望大發新年財嘅好機會。除咗喺賽馬方面有斬獲，當然希望今年能夠喺其他範疇，同樣得到財星拱照，荷包滿滿啦！既然人人想發財，小記就嚟著名玄學家區仲傅教路，喺屋企及公司布下橫財陣之餘，更傳授贏馬橫財陣，等大家有望今年橫財就手，贏到開巷！第一招家中財位 乾淨企理 未到馬會落飛前，梗係先喺屋企布番個橫財陣，廣納八方財氣後，再到馬會授注，自然能夠更為得心應手，據區師傅指，只要識得迎接屋企嘅招財位，共避過破財位嘅話，便能起著催吉避凶嘅作用，財氣自然能得以喺屋企聚納。區師傅更教路，如果想招納財氣嘅話，方法其實好簡單，只要保持招財位乾淨、企理就得。此外，如果門及床位對正招財位嘅話，效果就更為明顯。食得正財位，隨時３Ｔ都中埋！招財位：中宮：牛、兔、蛇、羊、雞、豬正東：鼠、虎、龍、馬、猴、狗破財位：東北：鼠、虎、龍、馬、猴、狗正北：牛、兔、蛇、羊、雞、豬第二招晶石招財 積聚財氣 水晶向來被視為具有催吉避凶嘅作用，而據聞水晶獨有嘅磁場，更能起著唔同功效。原來喺中國玄學上，水晶同樣具有催谷財運嘅功效，只要配合得宜，便能夠大大地提升橫財運。區師傅表示，如果將合適嘅晶石，配合所屬生肖嘅話，自然可以讓橫財運變佳。如果係咁嘅話，一於喺投注前，先喺屋企放番個水晶擺設，然後再到馬場發個新年財，到時真係翹埋雙手等收錢！ 鼠：紫黃晶 牛：藍虎眼石 虎：海藍寶 兔：金髮晶 龍：青金 蛇：斑彩螺 馬：蜜蠟 羊：紫金莎 猴：黑晶 雞：紫金晶 狗：碧茜 豬：綠幽靈第三招招財擺設 吸納財運 知道屋企招財位之後，梗係要諗吓計仔，點樣能夠盡納當中嘅財氣。除咗要將財位打掃乾淨，避免佢對藏污納垢，有損財氣積聚外，其實仲可以因應自己所屬嘅生肖，喺招財位上擺放適合嘅擺設，布下一個橫財陣，自然能夠起到招納財氣嘅作用。如此簡單嘅方法，既能提升橫財運，又能順道布置家居，仲唔快啲郁手？ 水種植物：兔、羊、豬 掛 畫：鼠、龍、猴 元 寶：虎、馬、狗 水 晶：牛、蛇、雞第四招公司財陣 橫財滾滾 橫財點解咁多人想要，無他嘅，一來希望唔使點做就大把錢使，二來又唔想返工捱騾仔，仲要日日要上司鞭策，如果想快啲榮華富貴嘅話，就要喺公司布番個橫財陣，自然可以財源廣進，自己開公司做老闆又得，搵夠之後去過啲舒適嘅退休生活亦得！區師傅表示，喺公司布橫財陣嘅方法非常簡單，只要配合生肖，喺辦公地方擺放水晶球、財神公仔、金元寶等擺設，便能有助橫財運勢，讓你頃刻變成千萬富翁！ 鼠：金元寶 牛：龍龜一隻 虎：黑晶球 兔：黃晶柱 龍：紫晶球 蛇：碧茜手鍵 馬：綠玉球 羊：財神公仔 猴：黃菊花 雞：黃晶球 狗：白晶球 豬：金手鏈第五招配合衣著 金銀齊來 喺屋企同公司都擺好橫財陣後，就想出門發橫財？唔使咁心急，因為你仲要揀番件合適嘅衣著，先至可以將屋企嘅旺氣，帶到屋外，買起馬嚟自然更為得心應手！據區師傅稱，喺新年時穿上配合生肖顏色嘅衣服，不但能提升個人魅力，更能有利財運。大家如果想馬運亨通，橫財就手嘅話，便要留意以下啱你嘅顏色喇！ 鼠：紅、金 牛：藍、黃 虎：綠、啡 兔：白、金 龍：紅、藍 蛇：綠、黃 馬：白、青 羊：綠、藍 猴：紅、黃 雞：啡、金 狗：白、藍 豬：黃、綠第六招出門吉時 得心應手 一切準備就緒後，仲要揀番個最聚財嘅吉時出門，咁就可以旺上加旺！據區師傅指出，唔同生肖嘅人都有唔同嘅話，然後去投注，就能令你揀選心水賽駒時更能得心應手，財源滾滾而來。 鼠：上午11點～中午12點 牛：上午10點～上午11點 虎：上午11點～中午12點 兔：上午12點～下午2點 龍：上午10點～下午2點 蛇：上午 9點～下午1點 馬：上午10點～上午11點 羊：上午11點～下午1點 猴：上午10點～下午1點 雞：下午 1點～下午3點 狗：上午9點～上午10點 豬：上午11點～中午12點第七招旺氣投注站 贏得勁 揀啱時間出門口後，到底去邊個投注站好呢？應該去最就腳嗰間，定係去間坊間傳言，最多人贏錢嗰間呢？其實想搵間最利自己嘅投注站，一啲都唔煩，只要揀得啱，自然能夠刀仔鋸大樹，橫財運暢旺！仲唔快啲睇吓邊間投注站最旺自己？ 鼠：天后英皇道、尖沙咀漢口道、葵涌青山道、元朗青山公路、 大埔廣福道、沙田沙角街、大圍顯徑邨商場、土瓜灣北帝街 牛：中環天星碼頭、北角電氣道、旺角亞皆老街、深水埗汝州街、 長沙灣順寧道、紅磡民裕街、彩雲邨第三期商場、黃大仙豪苑、 馬鞍山恒安邨 虎：中環士丹利街、北角馬寶道、小西灣商場、尖沙咀東科學館道、 旺角登打士街、石峽尾偉智街、何文田愛民邨、新蒲崗崇齡街、 牛頭角觀塘道、上水石湖墟、荃灣沙咀道 兔：中環天星碼頭、銅鑼灣謝斐道、筲箕灣道、尖沙咀寶勒巷、 旺角塘尾道、深水埗醫局街、九龍城街前塑道、九龍麗晶花園、 油塘中心、葵芳葵義路 龍：灣仔謝斐道、跑馬地藍塘道、柴灣常安街、西營盤屈地街、 太子彌敦道、石峽尾大埔道、長沙灣青山道、沙田大圍道、 樂富中心一期商場 蛇：慈雲山中心、觀塘康寧道、葵涌大隴街、荃灣青山道、 元朗洪水橋、大埔廣場、沙田好運中心、西貢福民路、 長洲大新後街 馬：上環水坑口街、灣仔軒尼詩道、香港仔中心、油麻地上海街、 黃大仙環鳳街、藍田啟田邨、青衣城商場、元朗泰衡街、 粉嶺聯和墟、粉嶺名都 羊：上環干諾道西、銅鑼灣波斯富街、西區卑路乍街、佐敦道、 深水埗桂林街、九龍城福佬村道、九龍灣德福、觀塘嘉樂街、 元朗合益路 猴：中環干諾道中、鰂魚涌英皇道、香港仔華富邨、旺角彌敦中心、 葵涌和宜合道、屯門建榮街、元朗錦田道、將軍澳寶林邨、 沙田禾輋商場 雞：灣仔春園街、上環德輔道西、旺角花園街、紅磡黃埔花園、 大角咀埃華街、荃灣荃富街、屯門市廣場 狗：香港仔石排灣道、佐敦柯士甸道、美孚百老匯街、土瓜灣道、 葵涌榮芳路、馬鞍山廣場、將軍澳尚德邨 豬：筲箕灣寶文街、旺角道、太子長沙灣道、油麻地砵蘭街、 美孚荔灣道、觀塘廣場、秀茂坪商場、葵興興芳路第八招投注窗口 大有斬獲 有啲馬迷喺買馬嘅時候，鍾意揀個靚冧巴嘅投注窗口，亦有馬迷鍾意搵個樣貌娟好嘅投注姐姐，貪佢順眼令自己心情好，究竟應該揀邊個投注窗口落飛好呢？區師傅就表示，如果想令自己喺新春賽馬日大有斬獲嘅話，唔洗心大心細，只需要揀個啱自己生肖嘅窗口數字，自然可以橫財就手！ 鼠：１、２、４ 牛：２、３、７ 虎：２、５、６ 兔：１、４、６ 龍：１、３、４ 蛇：２、３、５ 馬：３、４、６ 羊：１、２、５ 猴：２、３、６ 雞：３、５、６ 狗：１、３、４ 豬：２、４、５第九招旺氣騎師 旺足全年 人旺自然馬運暢旺，騎師當旺嘅話，想場場頭馬都冇問題！如果想貼中獨贏，位置加連贏嘅話，就要揀個牛年當旺嘅騎師！不過喺芸芸騎師當中，邊位騎師最適合大家重錘呢？區師傅認為喺眾騎師中，韋達、鄭雨滇、冼毅力、杜利萊、黎海榮及楊啓棠呢六位，佢哋騎運不俗，將會喺牛年有不俗嘅表現。只要跟實呢幾位騎師，就能輕而易舉獲勝啦！財星攻略旺財貼士入市必讀 除咗賽馬，仲有其他投注、投資工具，一樣需要講彩數講運氣，想喺今年財源廣進、盆滿缽滿，就要留意以下嘅旺財貼士喇！ 銀行類：牛、虎、蛇、羊、猴、狗、豬 木材類：鼠、兔、龍、馬、羊、狗 運輸類：牛、虎、龍、馬、雞、豬 電機類：鼠、虎、兔、龍、蛇、羊、雞、狗 地產類：鼠、牛、兔、蛇、馬、猴、雞、豬股票類別揀啱入市 雖然鼠年股市跌倒不少人大叫怕怕，但如果想過著魚翅做早餐，鮑魚當消夜日子嘅話，股票仍然係最快發達方法之一。如果想喺牛年股市中大有斬獲嘅話，只要識得食正股市波福，買啱適合自己生肖嘅股票類型嘅話，就算有 大風浪都唔使怕！對於牛年股市投資良機，區師傅指正月入市最為危險，及至農曆七月入市，先至係最好嘅時機。六合彩號碼發得多 買馬買股票外，想發橫財運嘅話，梗係唔少得香港人至愛嘅六合彩啦！望見個金多寶彩池有成千萬嘅時候，真係想重錘出擊，再嚟個一注獨中，從此成為千萬富豪。唔好以為呢個係夢想，只要揀啱一個旺自己嘅話，便有很大機會，可以夢想成真。 鼠：２、５、６ 牛：３、４、９ 虎：１、４、７ 兔：２、７、９ 龍：２、３、８ 蛇：１、４、５ 馬：２、５、６ 羊：１、３、８ 猴：４、６、７ 雞：１、７、９ 狗：１、２、７ 豬：４、５、８買樓方位對正財星 想用啲較為穩陣嘅方法嚟發達嘅話，買樓亦不失為一個好嘅投資方法。不過買樓唔同買衫，閒閒地都要幾十萬做首期。如果想投資有道，買到一間旺財靚樓嘅話，區師傅就話就要留意樓宇面向嘅方位，配合埋自己嘅生肖屬性，自然可以賺個盆滿缽滿！此外，區師傅更預測牛年樓市整體會下跌，上半年跌幅較大，及至年尾至會輕微上升，大家就要小心上車喇！ 向東南：鼠、蛇、雞 向正南：虎、羊、狗 向西北：兔、馬、猴 向西南：牛、龍、豬
